Маълум қилинишича, адвокатлик фирмаси адвокати фуқарога нисбатан 10 йил муддатга озодликдан маҳрум қилиш жазоси бўйича судда кўрилаётган шикоятни мансабдор танишлари орқали ижобий ҳал қилиб беришни ваъда қилган.
Натижада у тайинланган жазони 4 йил муддатга камайтириб бериш эвазига, ҳар бир йил учун 5 минг АҚШ долларидан, жами 20 минг АҚШ доллари олган вақтида ҳуқуқни муҳофаза қилувчи идоралар томонидан ашёвий далиллар билан ушланган.
Шунингдек, тезкор тадбир давом эттирилиб, мазкур ишга алоқадор бўлган, Тошкент шаҳридаги банклардан бирининг юристи ҳам адвокатдан 15 минг АҚШ доллари олган вақтида ушланди.
Терговга қадар текширув давомида, банк юристи прокуратура органларидаги қариндоши орқали ёрдам бермоқчи бўлганлиги аниқланган.
Ҳозирда ҳолат юзасидан адвокат ҳамда юристга нисбатан жиноят иши қўзғатилиб, тергов ҳаракатлари олиб борилмоқда.