Туркия нима учун Россияга санкция қўллай олмайди?
Эрдўған вакили жавоб беради.
Расмий Анқара Россияга қарши санкция жорий этмоқчи эмас.
Бу ҳақда Ражаб Тойиб Эрдўғаннинг расмий вакили Иброҳим Калын маълум қилди.
Унинг сўзларига кўра, бу Москва билан мулоқот канали сақланиб қолиши учун муҳим.
“Биз ўз давлатимиз манфаатлари юзасидан ҳаракатланишимиз керак. Россия билан музокара олиб бора оладиган томон бўлиш керак. Барча алоқалар узилганда ким Москва билан гаплашади? Биз бу канал сақланиб қолиши учун ҳам санкциялар жорий этишни режалаштирмаяпмиз”, – деган у CNN Turk телеканалига берган интервьюсида.
Шунингдек, у Анқарага зарар етказадиган чоралар кўрилмаслигини таъкидлаган. Сиёсатчининг сўзларига кўра, Туркиянинг "Россия билан туризм, табиий газ етказиб бериш, қишлоқ хўжалиги соҳаларида қалин савдо алоқалари бор”.
Маълумот ўрнида: 24 февраль куни Россия Украина шарқида махсус операция бошлашини эълон қилди. Ҳозирда мамлакатнинг турли нуқталарида жанглар кетмоқда. Ғарб бунга жавобан Москвага санкциялар жорий этди. Қора рўйхатда Путин, РФ ташқи ишлар вазири Сергей Лавров ва бошқа кўплаб олий мартабали амалдорлар ҳам бор.
Эслатиб ўтамиз, аввалроқ Зеленский Байден билан телефонда мулоқот қилгани тўғрисида хабар берилганди.
