Вашингтон Украина масаласига жиддий киришмоқчи

 

Яқин ҳафталар ичида Оқ уй АҚШнинг Украинага ҳарбий ёрдам кўрсатиш бўйича барча ҳаракатларини ягона миссияга бирлаштиради. Бу ҳақда The Wall Street Journal нашри хабар берди. 

 

Шундан кейин у ягона операцияга айланади ва ўз номига эга бўлади. Бундан ташқари, амалиётга генерал ягона раҳбар этиб тайинланади. У Украина ҳарбийларини тайёрлаш ва ёрдам кўрсатиш масалаларига бошчилик қилади.

 

Амалиётга ном бериш бюрократик расмиятчилик бўлса-да, у бир қанча жиддий юридик оқибатларни келтириб чиқаради.

 

Биринчидан, бу Вашингтоннинг аниқ ҳарбий-сиёсий можарода иштирок этаётганини билдиради.

 

Иккинчидан, эндиликда Конгресс иттифоқчиларга узоқ муддатга мақсадли молиявий манбалар ажратади.

 

Учинчидан, фақатгина номланган амалиётлар доирасида унда хизмат олиб бораётган ҳарбийлар учун рағбатлантириш ва мукофотлар тақдим этилади.

 

Тўртинчидан, ҳаракатларни мувофиқлаштириш учун раҳбарнинг тайинланиши Пентагоннинг Украинага доимий ёрдам тақдим этиш жамоасини тузиш истагини кўрсатади. Бу аскарларни тайёрлаш ва ёрдам кўрсатишнинг бир марталик лойиҳалар ўрнига узоқ муддатли стратегия танланганини англатади.

 

Шу билан Пентагон буни ҳозирча расман тасдиқламаган. Мудофаа вазирлиги вакили агар бу каби қадамлар амалга оширилса, зарур маълумот жамоатчиликка дарҳол берилишини маълум қилган.

 

Аввалроқ Вашингтон айрим қуролларни Киевга махфий тарзда етказиб бераётгани тўғрисида хабар берилганди.