Вашингтон Киевга тақдим этаётган айрим турдаги қуроллари ҳақида маълумот бермаётган бўлиши мумкин. Бу ҳақда Politico газетаси хабар берди.
“Вашингтонда АҚШ Киевга администрация эълон қилганидан кўпроқ ёрдам бергани тўғрисида тахминлар юрибди”, – дейилади хабарда.
Хусусан, бунга мисол қилиб Пентагон олий мартабали амалдорининг Украинага HARM радиолокацияга қарши ракетасини етказиб бергани ҳақидаги баёноти келтирилган. Қўшма Штатлар узоқ вақт бу ҳақда ҳеч қандай маълумот бермаган.
“Биз илк бор ушбу ракета етказиб берилаётгани ҳақида расмий маълумот берганимизда у ҳақида аниқ гапирмаганмиз. Уни радиолокацион хусусиятларга эга қурол деб атаганмиз”, – деган амалдор.
Бундан ташқари, Politico администрация Украинага ATACMS баллистик ракеталар етказиб берган бўлиши мумкинлигини тахмин қилган.
Газетанинг хабар беришича, ўтган ҳафта охирида эълон қилинган ҳарбий ёрдам пакетида Excalibur бошқариладиган артиллерия снарядлари ўрин олган. Улар ҳақида ҳам Пентагон баёнотларида гапирилмаган.
Аввалроқ Украинага энг кўп ёрдам кўрсатган давлатлар тўғрисида маълумот берилганди.