Хитойнинг АҚШдаги элчиси: “Сиз овозингизни ўчириб туришингиз керак”
Хитойнинг АҚШдаги элчиси билан боғлиқ кутилмаган вазият юзага келди. Бу ҳақда “The National Review” хабар берди.
Элчи Цинь Ган АҚШ ва Хитой муносабатлари бўйича миллий қўмитанинг ёпиқ видеоконференциясида Вашингтон вакилларидан овозини ўчириб туришни талаб қилган. Хабарда айтилишича, воқеа август охирида бўлиб ўтган.
Элчига икки давлат муносабатларини яхшилаш мақсадида нима қилиш мумкинлиги тўғрисида савол берилган. Бунга жавобан Цинь Ган Вашингтон вазиятни ёмонлаштиришни тўхтатиши зарурлигини айтган. “Аксинча, биз ўзаро келишмовчиликларни ҳал эта олмас эканмиз, овозингизни ўчириб туришингиз керак”, — деб қўшимча қилган. Аммо 31 август куни Хитой элчихонаси тақдим этган стенограммада учрашувдаги бу ҳодиса қайд этилмаган.
ОАВ Цинь Ганнинг бу нутқидан кейин элчи агрессив ва ҳужумкор услубда иш олиб бориши мумкинлигини тахмин қилган. Шуниси эътиборлики, у элчи бўлиб тайинланганига ҳали икки ой ҳам бўлгани йўқ.
АҚШ Хитой муносабатлари сўнгги йиллар давомида совуқлашган. 2018 йилда бошланган савдо уруши вазиятни янада чигаллаштирди.
Бундан аввал Си Цзинпинь ва Жозеф Байден ўртасида телефон орқали мулоқот бўлиб ўтгани хабар қилинган эди.
