Сўнгги пайтларда ижтимоий тармоқларда айрим шахслар томонидан фуқароларни Миср, Туркия, Саудия Арабистони каби мамлакатларда гўёки "расмий" диний таълим олишга чақирувчи эълонлар тарқалмоқда. Расмий кўринишда тақдим этилаётган бу ўқув марказлари амалда Ўзбекистон тегишли идоралари томонидан тан олинмаган ҳамда ноқонуний фаолият юритувчи муассасалар ҳисобланади.
Мутасаддилар огоҳлантиришича, бундай чақириқлар кўпинча диний ақидапарастлик ва мутаассиблик ғояларини тарғиб қилади, ёшларни нотўғри йўлга бошлайди ва дунёқарашига салбий таъсир кўрсатади. Шу сабабли ота-оналардан фарзандларининг интернетдаги фаолиятига, кимлар билан мулоқот қилаётганига ва қандай таклифларга жавоб бераётганига эътиборли бўлиш сўралмоқда.
Расмий диний таълим Ўзбекистон мусулмонлари идораси тизимидаги таълим муассасаларида берилади. Ҳозирда идора тасарруфида 4 та олий, 10 та ўрта махсус ислом таълим муассасаси ҳамда 28 та “Қуръон ва тажвид” курслари мавжуд бўлиб, сўнгги йилларда уларда 77 мингга яқин фуқаро билим олган. Бундан ташқари, «муслим.тв» платформасида барча ёшлар учун онлайн Қуръони тажвиди дарслари ташкил этилган.
Шунингдек, хорижий диний таълим муассасаларининг дипломлари Ўзбекистон ҳудудида диний соҳада фаолият юритиш учун асос бўла олмайди. Бу эса таълимдан сўнг ишга жойлашишда жиддий қийинчиликлар келтириб чиқариши мумкинлиги таъкидланмоқда.