Коронавируснинг “Omicron" штамми хавфи туфайли Япония ҳукумати мамлакатда доимий резидент бўлмаган хорижликларнинг киришига қўйилган тақиқни феврал ойи охиригача узайтиради. Бу ҳақда Япония бош вазири Фумио Кисида маълум қилди.
Аксарият тоифадаги хорижий фуқароларнинг келишини тақиқлаш ўтган йилнинг 30 ноябрида Японияда янги штамм билан касалланишнинг биринчи ҳолатлари тасдиқланганидан кейин жорий қилинган ва дастлаб бир ойга режалаштирилган эди.
Шунингдек, Японияга қайтган фуқаролар ва ушбу мамлакатда доимий яшовчи хорижликлар ҳукумат томонидан махсус ажратилган жойларда карантиндан ўтишлари шарт. Японияда “COVID-19” пандемияси бошланганидан бери 1,77 миллиондан ортиқ одам касалланган, 18,4 мингдан ортиқ одам вафот этган. 1,71 миллиондан ортиқ одам тузалиб кетди.
Аввалроқ АҚШда “Omicron" штаммининг тарқалиши сабабли минглаб рейслар бекор қилингани тўғрисида хабар берилган эди.