Украина Президенти Владимир Зеленский Россия урушни якунлашга тайёр эмаслигини билдирди. Унинг сўзларига кўра, Москва жараённи атайлаб чўзмоқда ҳамда АҚШнинг янги санкцияларидан қочишга уринмоқда.
Бу ҳақда Зеленский 22 август куни Киевда НАТО бош котиби Марк Рутте билан ўтказилган қўшма матбуот анжуманида маълум қилди.
“Россия ультиматумлар қўймоқчи ва улар орқали урушни тугатиш имкониятини кечиктирмоқда. Улар АҚШ санкцияларидан қутулиш учун барча чораларни кўрмоқда”, — деди Украина раҳбари.
Зеленскийнинг таъкидлашича, Москва етакчилар даражасида Украина билан саммит ўтказишга қизиқмаяпти, чунки аслида урушни якунлаш ниятида эмас.
Шунингдек, у Россия билан потенциал учрашув бўйича келишув мавжуд эмаслигини қўшимча қилди. Бироқ Зеленский фикрича, “Путинни тўхтата оладиган ягона шахс” – АҚШ президенти Доналд Трампдир.