Reuters агентлиги хабарига кўра, Россия Президенти Владимир Путин Украина бўйича янги шартларни илгари сурмоқда.
Манбаларга кўра, Путин Украина НАТОга аъзо бўлиш режасидан воз кечиши, ҳарбий нейтрал мақомини сақлаб қолиши ҳамда ҳудудида ғарбий қўшинларни, жумладан, тинчликпарвар кучларни ҳам жойлаштирмаслик мажбуриятини олишини талаб қилмоқда. Шунингдек, у Киевдан ҳали назоратида бўлган Донбасснинг бир қисмини топширишни сўраяпти.
Маълумотларга кўра, Путин июн ойида бутун Донецк, Луганск, Херсон ва Запорожье вилоятларидан воз кечишни талаб қилган эди. Бироқ янги таклифларида Кремль айрим ҳудудий масалаларда муросага тайёрлигини билдирган. Хусусан, Россия армияси назоратида бўлган Харьков, Суми ва Днепропетровск вилоятларининг айрим ҳудудларини Украинага қайтариш масаласи муҳокама қилинган. Шу билан бирга, Россия Херсон ва Запорожедаги амалдаги фронт чизиғи бўйича ҳаракатларни тўхтатишга тайёр.
Путин, шунингдек, НАТОнинг шарққа кенгаймаслиги бўйича ҳуқуқий мажбурий кафолатлар талаб қилмоқда ҳамда Украина қуролли кучлари сонининг чекланишини истамоқда.
Reuters’га кўра, учрашувда Россия раҳбари “муросага ва тинчликка тайёр” эканини таъкидлаган.