Вашингтонда бўлиб ўтган учрашувда Доналд Трамп Зеленскийни Оқ уйда тантанали кутиб олди. Бу сафар Украина президенти аввалги учрашувдаги хатоларини такрорламасликка ҳаракат қилди: Трампни бир неча бор миннатдорлик билан тилга олди ва дипломатик оҳангни сақлашга интилади. Сухбат давомида Трамп Украина можаросини ҳал қилишда асосий мақсад узоқ муддатли тинчлик эканини айтди. Бу ҳақда CNN нашри хабар берди.
Матбуот учун очиқ қисмда Зеленский Трампга рафиқаси Оленанинг Мелания Трампга йўллаган мактубини топширди. Кейинчалик икки раҳбар Россия томонидан босиб олинган ҳудудлар акс этган катта харита устида муҳокама олиб борди. Оқ уй расмийси Трампнинг Путин билан 40 дақиқа телефон орқали гаплашганини тасдиқлади.
Европа етакчилари ҳам иштирок этган кенгайтирилган учрашувда Зеленский Путин билан эҳтимолий уч томонлама музокараларга тайёрлигини маълум қилди. Франция президенти Эммануэль Макрон эса бундай учрашув фақат ўт очишни тўхтатиш шарти билан ўтказилиши мумкинлигини таъкидлади. Германия канцлери Фридрих Мерзнинг сўзларига кўра, Путин икки ҳафта ичида Зеленский билан учрашишга розилик билдирган.
Учрашувнинг энг муҳим натижаси сифатида Украина хавфсизлиги учун янги кафолатлар бўйича келишув йўлга қўйилди. Зеленский Европа маблағлари ҳисобига 90 миллиард долларлик Америка қуролларини сотиб олиш ва дрон ишлаб чиқариш лойиҳасини муҳокама қилганини маълум қилди. Шу билан бирга, у Россияга ҳудудий имтиёзлар бериш вариантинни қатъиян рад этди.
Трамп эса Украина масаласи бўйича “катта битим” тузиш ниятини билдириб, Путин билан Зеленский ўртасида тарихий учрашув ташкил этишга уринаётганини айтди. Шу тариқа, Оқ уйда бўлиб ўтган учрашувлар Украина урушига нуқта қўйиш йўлида муҳим босқич сифатида қайд этилди.