AQSH bosh infeksionisti: “Koronavirusda o‘lim holati kamayishining yagona yo‘li — emlash”
AQSH bosh infeksionisti Entoni Fauchi koronavirusda o‘lim holati kamayishining yagona yo‘lini maʼlum qildi. Bu haqda u “CNN”ga bergan intervyusida aytib o‘tgan.
Fauchining fikricha, buning yagona yo‘li – emlash. Kelajakda qanchalik ko‘p amerikalik emlansa, 1 millionga yaqin o‘lim holatining oldini olish mumkin. "Bizda barcha imkoniyat bor, bizda vaksinalar bor. Ular yuqori samaradorlikka ega hamda xavfsiz", — degan ekspert.
Olimlar koronavirusga qarshi kurashning eng maqbul yo‘li emlanish ekanini bot-bot aytmoqda. Hozirga kelib butun dunyoda milliardlab doza vaksina qilindi. Xususan, o‘tgan hafta Xitoyda 1 milliardan ortiq kishi to‘liq emlandi. Shuningdek, AQSHda amaldorlarning majburiy emlanishi joriy qilindi, aks holda ular lavozimidan ayrilishi mumkin.
Buyuk Britaniya va AQSHda bolalar ham vaksina olishi tartibi ishlab chiqildi. Bunda asosan Pfizer/BioNTech vaksinalaridan foydalaniladi.
Eslatib o‘tamiz, bundan avval Fransiyada majburiy emlanishga qarshi shifokorlar namoyish o‘tkazgani xabar qilingan edi.
Jahongir Qo‘ziyev
