Mulla Barodar Afg‘onistonda tibbiyot bilan bog‘liq vaziyat og‘irligini aytdi
JSST bosh direktori Afg‘onistonga keldi.
Tedros Adanom Gebreisus mamlakat bosh vaziri Muhammad Hasan Ohun bilan uchrashgan. Uchrashuvda bosh vazir birinchi o‘rinbosari Mulla Abdulg‘ani Barodar va tashqi ishlar vaziri Amirxon Mutaqqiy ham ishtirok etgan.
Muhammad Hasan Ohun xalqaro hamjamiyatni yana-da ko‘proq gumanitar yordam berishga chaqirdi. Uning fikricha, gumanitar yordam-siyosatdan alohida bo‘lishi lozim. Shuningdek, Afg‘oniston bosh vaziri mamlkatga nisbatan joriy etilgan barcha sanksiyalarni bekor qilish zarurligini aytgan.
Mulla Barodar Afg‘onistonda tibbiyot bilan bog‘liq vaziyat og‘ir ekanini taʼkidlagan: “Agar zarur yordam ko‘rsatilmasa, tibbiyot muassasalari yopilishi mumkin".
O‘z navbatida, JSST rahbari mamlakatni gumanitar halokatdan asrab qolish uchun yordam berilishi davom etishini maʼlum qilgan. Shu bilan birga JSST xodimlarining Afg‘onistonda soni oshirilishini ham aytgan.
Afg‘onistonda so‘nggi paytlarda gumanitar vaziyat og‘irlashdi. Maʼlumotlarga ko‘ra, mamlakatning 90 foizga yaqin aholisi ko‘makka muhtoj. Turli davlatlar Afg‘onistonga yordam bermoqda. Xususan, joriy yilning 4 sentyabr kuni O‘zbekiston 1,3 ming tonna gumanitar ko‘mak yuborgan.
Eslatib o‘tamiz, avvalroq “Tolibon” shahar boshqaruvida ishlaydigan ayollarning ishdan bo‘shashini talab qilgandi.
Jahongir Qo‘ziyev
