Panjsherga zudlik bilan yordam berish kerak – Tojikiston TIV
Tojikiston tashqi ishlar vaziri jahon hamjamiyatini Panjsherga yordam berishga chaqirdi. Sirojiddin Muhriddin bu haqda BMT minbarida turib gapirgan.
“Tashqi ishlar vaziri o‘z chiqishida Panjsher viloyati aholisining og‘ir ahvoli haqida gapirdi”, deyiladi TIV bayonotida. Shuningdek, toliblar viloyatda nafaqat qonun buzayotgani, balki tinch aholini qiynoqqa solayotgani ham maʼlum qilingan. Shuning uchun xalqaro hamjamiyat yordami so‘ralgan. Panjsherga olib boradigan yo‘llarni ochish, shu orqali viloyatga gumanitar yordam yuborish zarurligi taʼkidlangan.
Sirojiddin Muhriddin barcha etnik qatlamlarni o‘z ichiga olgan inklyuziv hukumat tuzilishi shartligini alohida qayd etgan. Ayniqsa, Afg‘oniston tojiklarini bu hukumatga jalb qilish kerak, chunki “ular Afg‘oniston aholisining 46 foizini tashkil etadi”. Shu bilan birga Tojikiston diplomatiyasi rahbari zudlik bilan gumanitar yordam taqdim etish va ayollarning taʼlim huquqini taʼminlash lozimligini aytgan.
Panjsher Afg‘onistonning “Tolibon” tomonidan egallanmagan so‘nggi viloyati edi. Ammo 6-sentabr kuni bu hudud ham harakat nazoratiga o‘tdi.
Avvalroq “Tolibon” BMTda doimiy vakilini tayinlagandi.
Jahongir Qo'ziyev
