Аҳмад Масъуд: “Толибон”га қарши кураш давом этади”
Аҳмад Масъуд Панжшер аҳолисига мурожаат билан чиқди.
Масъуд урушда мағлуб бўлганини тан олган. Қўмондоннинг сўзларига кўра, толиблар тарафида чет эл қўшинлари жанг қилган. У Афғонистон халқини “Толибон”га қарши қўзғолон кўтаришга чақирган.
“Толиблар билан тўқнашувда оила аъзоларимдан баъзилари ҳалок бўлди, баъзилари яраланди”, - деган Панжшер етакчиси. Шунингдек, Масъуд тез орада Қаршилик фронтининг янги спикери тайинланишини айтган. Ўтган тунда ҳаракат собиқ спикери Фаҳим Даштий толиблар билан жангда ҳалок бўлган эди.
Аҳмад Масъуд жаҳон ҳамжамиятини “Толибон” ҳокимиятини тан олмасликка чақирган. Шу билан бирга у кураш давом этишини таъкидлади.
Панжшер шу кунгача толиблар томонидан бўйсундирилмаган ягона вилоят бўлиб қолаётган эди. 5 сентябрь куни вилоятга ҳужум кучайган ва унинг катта қисми эгалланган. 6 сентябрда “Толибон” расмий вакили Забиҳулло Мужоҳид Панжшер тўлиқ назоратга олинганини эълон қилди.
Аҳмад Масъуд Панжшерга қарши толиблар эмас, Покистон армияси ва разведкаси уруш олиб бораётганини қайд этган. Баъзи манбалар буни тасдиқлаган. Хусусан, Покистон махсус кучлари вилоятга кириб келган. Исломобод ҳарбий-ҳаво кучлари дронлари бошқариладиган ракеталар билан зарба берган.
Жаҳонгир Қўзиев
