Толиблар Муҳаммад Суҳайл Шахинни Афғонистоннинг БМТдаги доимий вакилига номзод сифатида кўрсатган. Ташкилот бош котиби расмий вакили Стефан Дюжаррик 20 сентябрь куни БМТга шу мазмунда хат келганини маълум қилди.
Хат ташқи ишлар вазири Амирхон Мутаққий номидан жўнатилган. Унда БМТ Бош Ассамблеясининг 76 сессиясида қатнашиш сўралган. Шунингдек, 15 август куни Ашраф Ғани истеъфога чиққани ва у энди Афғонистон Президенти эмаслиги қайд қилинган.
“Мактубда Афғонистоннинг БМТдаги вакили бундан буён мамлакат номидан иш олиб бормаслиги айтилган. Муҳаммад Суҳайл Шахин янги доимий вакил этиб кўрсатилган”, – деган Дюжаррик.
Шу билан бирга 15 сентябрь куни Афғонистоннинг БМТдаги доимий вакили Ғулом Исҳоқзай номидан ҳам хат келган. Шундан кейин Исҳоқзай Афғонистон делегацияси раҳбари этиб рўйхатга олинган.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрьда ушбу ҳудуд ҳам “Толибон” назоратига ўтди. Шундан кейин 7 сентябрь куни мамлакатнинг янги ҳукумати тузилгани эълон қилинди.
Бундан аввал Афғонистон дипломатлари тақдири номаълумлигича қолаётгани хабар қилинганди.
Жаҳонгир Қўзиев