Yaponiyada kuchli zilzila sodir bo‘ldi
6,1 magnitudali zilzila poytaxt Tokioga qo‘shni Chiba prefekturasida sodir bo‘lgan. Bu haqda Yaponiyaning bosh meteorologiya boshqarmasi maʼlum qildi.
Qayd etilishicha, tabiiy ofat mahalliy vaqt bilan 22:41 da yuz bergan. Zilzila taʼsiri Yaponiyaning 47 prefekturasidan 26 tasida sezilgan. Qurbonlar va vayronagarchiliklar haqida hozircha aniq maʼlumot yo‘q.
Mahalliy NHK telekanali zilzila taʼsirida besh kishi jarohatlanganini xabar qilmoqda.
Bosh vazir Fumio Kisida maʼlumotlarni aniqlashtirish va odamlarning hayotini saqlab qolish uchun choralar ko‘rishga chaqirgan.
Yaponiya poytaxti hududidagi zilzila oqibatida kamida 16 kishi shikastlandi, deya xabar berdi hukumat bosh kotibi Xirokadzu Matsuno. Favqulodda xizmatlarga, asosan, Kanto mintaqasi, Tokio va unga yaqin prefekturalarda ko‘p sonli murojaatlar bo‘lgan.
OAV maʼlumotlariga ko‘ra, Tokioda metro poyezdlari harakati to‘xtatilgan. Zilziladan so‘ng 250 ga yaqin uy elektr taʼminotidan uzilib qolgan.
Tokiodagi "Nippori-Toneri Liner" yo‘nalishida poyezd qisman relsdan chiqib ketishi oqibatida kamida uch kishi jarohat olgani aytilmoqda.
Eslatib o‘tamiz, аvvalroq Gaitida 7,2 magnitudali zilzila yuz bergani hamda kuchli zilzila natijasida to‘fon yaqinlashgani haqida xabar bergan edik.
