Xitoyda suv toshqinlari oqibatida 15 kishi halok bo‘ldi
Xitoyning Shansi provinsiyasida 15 kishi suv toshqinida halok bo‘ldi, yana uch kishi bedarak yo‘qolgan. Bu haqda Xitoy OAV xabar bermoqda.
Kuzgi yog‘ingarchilik tufayli kelib chiqqan suv toshqinidan 1,8 millionga yaqin odam zarar ko‘rdi. 120 mingdan ortiq fuqaro xavfsiz tumanlarga evakuatsiya qilinadi. 37 mingdan ortiq uy va binolar zarar ko‘rgan yoki butunlay vayron bo‘lgan. Tabiiy ofatdan ko‘rilgan to‘g‘ridan-to‘g‘ri iqtisodiy zarar 770 million dollarga baholanmoqda.
Qutqaruvchilar bo‘linmalari qum to‘ldirilgan qoplar yordamida sohillarni mustahkamlashga urinmoqda. Ammo yomg‘ir to‘xtamayotgani ularning ishini qiyinlashtirmoqda.
Avvalroq Turkiyaning shimoli-sharqidagi Rizo va Artvin provinsiyalarida kuchli yomg‘ir suv toshqiniga sabab bo‘lgani, AQSHning Tennessi shtatidagi suv toshqinlarida 20 dan ziyod kishi, Afg‘onistonda suv toshqini oqibatida 150 kishi hamda Pokistonda kuchli yog‘ingarchilik tufayli 18 kishi halok bo‘lgani haqida xabar berilgandi.
Sharofat Mahmudova
