2022-yilda Samarqandda Jahon mamlakatlari parlamentlari ayol spikerlarining sammitini o‘tkazish rejalashtirilmoqda
Senat axborot xizmatining xabar berishicha, Oliy Majlis Senati Raisi Tanzila Norboyeva boshchiligidagi O‘zbekiston delegatsiyasi Rossiyaning Sankt-Peterburg shahrida bo‘lib o‘tgan uchinchi Yevrosiyo ayollar forumining “Tinchlik va ishonch diplomatiyasini rivojlantirishda ayollar missiyasi” deb nomlangan yalpi majlisida ishtirok etdi.
Majlisda Ozarboyjon, Bangladesh, Vyetnam, Qozog‘iston, Qirg‘iziston, Gabon, Mozambik, Mo‘g‘uliston, Moldova, Nikaragua, Tojikiston, Turkmaniston, Zimbabve va Eron kabi jami 110 ta mamlakatning 350 ga yaqin delegati, ijro etuvchi hokimiyat vakillari, xalqaro va nodavlat tashkilotlar rahbarlari, shuningdek, ishbilarmon doiralar, jamoat va akademik tashkilotlar vakillari qatnashdi.
Tadbirda Oliy Majlis Senati Raisi Tanzila Norboyeva so‘zga chiqib, O‘zbekistonda amalga oshirilayotgan islohotlar va o‘zgarishlarning asosiy natijalari, siyosiy tashabbuslar, shuningdek, mamlakatda xotin-qizlarning huquqlari va imkoniyatlarini kengaytirish chora-tadbirlari haqida maʼruza qildi.
Taʼkidlanishicha, Tanzila Norboyeva O‘zbekiston tomoni xotin-qizlar huquqlari va gender tenglikni xalqaro hamjamiyatda targ‘ib qilish bo‘yicha tajriba almashishga va boshqa davlatlarning bu boradagi ilg‘or amaliyotini o‘rganishga tayyorligini bildirgan.
Majlis ishtirokchilari 2022-yilda Samarqand shahrida o‘tkazilishi rejalashtirilayotgan Jahon mamlakatlari parlamentlari ayol spikerlarining navbatdagi 14-sammitiga taklif etilgan.
Avvalroq parlament ayol rahbarlarining navbatdagi sammiti O‘zbekistonda o‘tkazilishi hamda Turkmanistonda Markaziy Osiyo yetakchi ayollari muloqotining forumi bo‘lib o‘tgani haqida xabar qilingan edi.
