“Е-8” vizasi asosida 420 nafar fuqaro Koreyaga ishga yuborildi
Xabaringiz bor, davlatimiz rahbari tomonidan "Xorijga tashkillashtirilgan mehnat migratsiyasiga ketayotgan fuqarolarni rag‘batlantirish bo‘yicha qo‘shimcha chora-tadbirlar to‘g‘risida"gi qaror qabul qilingan.
Qarorga muvofiq, 2021-yil 1-sentabrdan mehnat migrantlarining:
-
xorijiy tillar yoki kasb bo‘yicha malaka imtihonlarini topshirish (BHM -bazaviy hisoblash miqdorining 3 barobarigacha);
-
yo‘l transport chiptasi (BHM 2 barobarigacha);
-
ishchi vizalarini rasmiylashtirish (BHM 5 barobarigacha) xarajatlarining bir qismi davlat hisobidan qoplab beriladi.
Joriy yilning o‘tgan 9 oyi davomida mehnat migratsiyasi geografiyasini kengaytirish maqsadida 18 ta davlat bilan hukumatlararo va idoralararo bitim imzolash ishlari olib borildi.
22 ta xorijiy davlatning 199 ta ish beruvchi va rekruting agentliklari bilan hamkorlik shartnomalari imzolandi va jami kelishuv shartnomalari soni 320 taga yetdi. Ularda O‘zbekiston bozori uchun 72 mingdan ortiq ish joylari aniqlandi.
AOKAda bo‘lib o‘tgan brifingda Bandlik va mehnat munosabatlari vazirligi axborot xizmati rahbari Mavjuda Mirzayeva tashqi mehnat migratsiyasi sohasida amalga oshirilgan ishlar haqida maʼlumot berdi.
Maʼlum bo‘lishicha, Koreyaning 5 ta okrug va provinsiyalari bilan “Ye-8” vizasi asosida qishloq xo‘jaligidagi mavsumiy ishlarga yuborish bo‘yicha imzolangan memorandum va kelishuvlarga ko‘ra dastlabki 420 nafar fuqaro Koreyaga ishga yuborildi. Germaniyaning 2 ta yirik kompaniyalari bilan fuqarolarni Germaniya hududida “dual tizim” asosida ishga joylashtirish bo‘yicha Bitim imzolandi va pilot bosqichida ish beruvchilar tomonidan tanlab olingan fuqarolar Germaniyaga yuborildi. Нozirda 13 nafar fuqaroning viza hujjatlari rasmiylashtirilmoqda.
Shuningdek, Kanada, Latviya, Bolgariya, Isroil, Polsha, Shvetsariya, Slovakiya, Niderlandiya Qirolligi va Chexiya ish beruvchilari bilan imzolangan shartnomalarga asosan O‘zbekiston fuqarolarini ishga yuborish ishlari davom ettirilmoqda.
Eslatib o‘tamiz, Bandlik va mehnat munosabatlari vazirligi jamg‘armasi mablag‘lari hisobidan tashkillashtirilgan mehnat migratsiyasiga ketayotgan fuqarolarga malaka imtihonlarini topshirish uchun uch, yo‘l chiptasini xarid qilish uchun ikki, "ishchi viza"ni rasmiylashtirish uchun besh bazaviy hisoblash miqdorigacha kompensatsiya to‘lanadi.
Bundan tashqari, mehnat migratsiyasi davrida turli baxtsiz hodisaga uchragan yoki og‘ir kasalga chalingan fuqarolar va ularning voyaga yetmagan farzandlarini vatanga qaytarish va agar ushbu fuqaroni tibbiy xodim kuzatuvi ostida qaytarish zarur bo‘lsa tibbiyot xodimining xizmat safari bilan bog‘liq xarajatlar Jamg‘arma hisobidan qoplanadi.
Maʼlumot uchun, bugungi kunda Rossiya Federatsiyasining vakolatli tashkilotlari bilan hamkorlikda Rossiya hududida qurilish sohasiga 10 ming nafar O‘zbekiston fuqarolarini mehnat shartnomasi asosida tashkiliy tarzda jalb etish bo‘yicha “pilot loyiha” amalga oshirilmoqda.
Bundan avval Rossiyada migratsiya to‘g‘risida yagona hujjat joriy etilgandi. Shuningdek, o‘n ming O‘zbekistonlik yaqin vaqt davomida Rossiyaga ishga jalb qilinishi, Tashqi Mehnat migratsiyasi orqali ishlashga ketgan fuqarolarning noroziligi, Rossiyada yuz bergan ommaviy mushtlashuvda ishtirok etgan migrantlar 40 yilga deportatsiya qilingani hamda Rossiya migrantlarga yangi majburiyat yuklamoqchiligi haqida xabar berilgandi.
