Moskva konferensiyasi ishtirokchilari va qo‘shnilarimizdan bizni qo‘llab-quvvatlashlarini so‘ramoqchimiz — Zabihullo Mujohid
“Tolibon” Moskva formatidagi uchrashuvda ishtirokchilardan iqtisodiy va siyosiy qo‘llab-quvvatlashni so‘ramoqchi. Bu haqda harakat rasmiy vakili Zabihullo Mujohid “TASS” nashriga maʼlum qildi.
“Moskva konferensiyasi ishtirokchilari va qo‘shnilarimizdan bizni, ayniqsa, iqtisodiy va siyosiy-diplomatik sohada qo‘llab-quvvatlashlarini so‘ramoqchimiz”, – degan Mujohid.
Shu bilan birga toliblar vakili Afg‘oniston mintaqa xavfsizligi va barqarorligida muhim rol o‘ynashini taʼkidlagan. “Tolibon” delegatsiyasi ham aynan shu masalani muhokama qiladi.
“Tabiiyki, konferensiyada siyosiy va iqtisodiy masalalar, shuningdek, Afg‘oniston hamda mintaqa tinchligi muammolari ko‘tariladi”, – deb qo‘shimcha qilgan Mujohid.
Moskva formatidagi uchrashuv bugun, 20 oktabr kuni bo‘lib o‘tadi. Unda “Tolibon” delegatsiyasiga bosh vazir o‘rinbosari Abdul Salom Xanafiy boshchilik qiladi. Shuningdek, tashqi ishlar vaziri v.b. Amirxon Mutaqqiy ham ishtirok etishi kutilyapti.
Bundan avval O‘zbekiston va “Tolibon” ishchi guruhlar tuzishga kelishib olgani hamda AQSHning Afg‘onistondagi siyosati qayta ko‘rib chiqilishi xabar qilingandi.
