“O‘zbekistondagi Prezidentlik saylovlarining adolatli o‘tishi MDH uchun ham juda muhim” — Sergey Lebedev
Mustaqil Davlatlar Hamdo‘stligi Ijroiya qo‘mitasi raisi— Ijrochi kotibi Sergey Lebedev mamlakatimizda 24 oktyabr kuni bo‘lib o‘tadigan saylovlarni kuzatish maqsadida O‘zbekistonga keldi. U MDH Ijroiya qo‘mitasi kuzatuvchilari missiyasiga rahbarlik qilmoqda.
Bugun, 21-oktabr kuni Markaziy saylov komissiyasi Raisi Zayniddin Nizamxodjayevning Mustaqil Davlatlar Hamdo‘stligi Ijroiya qo‘mitasi raisi – Ijrochi kotibi Sergey Lebedev bilan uchrashuvi bo‘lib o‘tdi.
Unda O‘zbekiston saylov qonunchiligidagi yangiliklar, Prezident sayloviga tayyorgarlik ko‘rish va uni o‘tkazish doirasida amalga oshirilayotgan ishlar to‘g‘risida maʼlumot berildi. Saylov kampaniyasi tadbirlari Saylov kodeksi talablari va demokratik prinsiplarga muvofiq amalga oshirilayotgani taʼkidlandi.
Qayd etish joiz, MDH Ijroiya qo‘mitasi xalqaro kuzatuvni tashkil qilishda katta tajriba, shuningdek, saylovlarni kuzatish bo‘yicha rivojlangan huquqiy bazaga ega.
— Biz O‘zbekistonning deyarli barcha viloyatlarida saylovlarning qanday o‘tishini quzatmoqchimiz, — deydi MDH Ijroiya qo‘mitasi raisi Sergey Lebedev. — Missiyamiz vakillari allaqachon baʼzi tumanlarda bo‘ldi. Uchastkalardagi vaziyatni o‘rgandi. O‘zbekistondagi Prezidentlik saylovlari adolatli o‘tishi nafaqat O‘zbekiston, balki butun Mustaqil Davlatlar Hamdo‘stligi uchun juda muhim. O‘zbekiston qardosh mamlakat, qardosh xalq bo‘lgani uchun, bizni saylov qanday o‘tkazilishi qiziqtirmaydi. Balki biz hammamiz saylovning yuqori saviyada o‘tib, O‘zbekiston xalqi munosib rahbarni tanlashi tarafdorimiz.
O‘zbekiston Respublikasi Markaziy saylov komissiyasi taklifiga binoan MDH Ijroiya qo‘mitasi kuzatuvchilari missiyasi 24 oktyabr kuni bo‘lib o‘tadigan saylovga tayyorgarlik ko‘rish va uni o‘tkazish jarayonini kuzatib boradi. Missiya O‘zbekistonga tashrifi mobaynida respublikamizning bir qator saylov uchastkalarida bo‘lib, saylovlar yuzasidan o‘zining tegishli xulosalari va tavsiyalarini berishni rejalashtirgan.
Maʼlumot uchun: MDHga aʼzo 7 ta davlatdan O‘zbekistondagi Prezident saylovini yoritish maqsadida 162 nafar OAV vakillari akkreditatsiyadan o‘tdi.
Eslatib o‘tamiz, kecha. 20 oktyabr kuni MSK raisi Turkiya Oliy saylov kengashi vakillari bilan uchrashgandi.
Avvalroq IHT kuzatuvchilar missiyasi O‘zbekistonga kelgani hamda afg‘onistonlik kuzatuvchining saylovga oid fikrlari to‘g‘risida xabar berilgandi.
Bahriniso Madumarova
