Кузатувчилардан бири афғонистонлик Нури Ҳусайн Али. У “Уфқ” халқаро ахборот агентлиги раҳбари. Ҳусайн Али Ўзбекистон Президенти сайлови борасидаги фикрлари билан бўлишди.
––24 октябрь куни бўлиб ўтадиган Ўзбекистон Республикаси Президенти сайловига кузатувчи сифатида таклиф этилганман. Ўзбекистондаги сайловларда илк маротаба иштирок этишим. Бундан аввал Эрон ва Афғонистондаги сайловларда кузатувчи бўлганман.
Кўплаб ижобий ўзгаришларни кўряпман. Айниқса, журналистлар учун яратилган шароитлар таҳсинга лойиқ. Ҳамма ўз фикрини эркин билдира олади. Мен кўплаб ўзбеклар билан суҳбатлашдим. Улар ўз мустақил фикрига эга. Фикримча, сайловчилар юрт учун, унинг эртанги тараққиёти, келажаги учун чин дилдан хизмат қиладиган муносиб номзодни сайлайди. Бу Ўзбекистон халқи учун ўз номзодини сайлаш учун катта имконият демакдир.
Афғонистонда сайлов ўтказиш бўйича тажриба бор эди. Аммо биз ҳақиқий сайловларни ташкиллаштира олмадик. Халқ овоз берган номзод бир четда қолиб, биз учун бошқалар ўз танловини амалга оширди.
Аввалроқ Туркманистонда Ўзбекистон Президенти сайловига бағишланган брифинг ташкил этилгани ҳамда Ислом ҳамкорлик ташкилоти кузатувчилар миссияси Ўзбекистонга келгани хабар қилинганди.
Жаҳонгир Қўзиев