Ayrim oziq-ovqat mahsulotlari qo‘shilgan qiymat solig‘idan ozod etilishi mumkin
Senat yalpi majlisida “O‘zbekiston Respublikasining Soliq kodeksiga aholini asosiy turdagi oziq-ovqat mahsulotlari bilan kafolatli taʼminlashga qaratilgan qo‘shimcha kiritish to‘g‘risida”gi qonun ko‘rib chiqildi.
Senat axborot xizmati xabariga ko‘ra, qonun bilan respublikada go‘sht mahsulotlari va asosiy isteʼmol mahsuloti bo‘lmish kartoshkaga bo‘lgan talab va narxlar barqarorligini taʼminlash orqali aholi daromadlarini oshirish maqsadida Soliq kodeksiga qo‘shimcha kiritilmoqda.
“Xususan, Soliq kodeksining 483-moddasiga 2021 yil 10 oktyabrdan 2021 yil 31 dekabrga qadar bo‘lgan davrda go‘sht (mol, qo‘y, tovuq), tirik hayvonlar (qoramol va parranda) va ularni so‘yish mahsulotlari, kartoshka hamda muzlatilgan baliqni O‘zbekiston Respublikasi hududiga olib kirish, shuningdek ularni realizatsiya qilish bo‘yicha aylanmalar qo‘shilgan qiymat solig‘idan ozod qilish bo‘yicha qo‘shimcha norma kiritilmoqda”.
Qonun senatorlar tomonidan maʼqullangan.
Maʼlumot uchun: Prezident “Qo‘shilgan qiymat solig‘i maʼmuriyatchiligini takomillashtirish to‘g‘risida”gi qarorni imzoladi.
Eslatib o‘tamiz, go‘sht (mol, qo‘y, tovuq), tirik hayvonlar (qoramol va parranda) va ularni so‘yish mahsulotlari, kartoshka hamda muzlatilgan baliqni O‘zbekistonga olib kirish, ularni sotish bo‘yicha aylanmalarni QQSdan ozod qilishni nazarda tutuvchi qonun loyihasi ishlab chiqilgandi.
Avvalroq asosiy oziq-ovqat mahsulotlarining narxlari keskin oshishi mumkinligi, o‘simlik moyiga bo‘lgan yillik ehtiyoji qanchaligi hamda dunyoda yil boshidan buyon ilk bor oziq-ovqat narxlari pasaygani haqida xabar berilgandi.
