2021-yilning yanvar oyidan buyon aholi daromadlari o‘rta hisobda qanchaga oshgani maʼlum qilindi
Markaziy bank boshqaruvining joriy yil 2-oktabr kuni bo‘lib o‘tgan yig‘ilishi yakunlari bo‘yicha Markaziy bank boshqaruvi raisining maʼruzasi eʼlon qilindi.
Qayd etilishicha, 2021-yilning yanvar-sentabr oyida shakllangan iqtisodiy sharoitlarda, yaʼni pandemiya davrida iqtisodiyotni qo‘llab-quvvatlash borasida davlat va bank tizimi tomonidan ko‘rilgan chora-tadbirlar bugungi kunda iqtisodiy faollik, ishlab chiqarish surʼatlarini pandemiyagacha bo‘lgan o‘sish trayektoriyasiga chiqib olishiga imkon bergan.
Shuningdek, 2021-yil 9 oyi yakunlari bo‘yicha yalpi ichki mahsulotning real o‘sishi esa 6,9 foizni tashkil etdi. O‘tgan yil bilan taqqaoslanganda:
– sanoatda ishlab chiqarish hajmlari – 9 foizga;
– qishloq xo‘jaligida – 4,2 foizga;
– qurilish sohasi – 4,5 foizga;
– asosiy kapitalga yo‘naltirilgan investitsiyalar – 5 foizga o‘sgan.
Bundan tashqari, 2021-yilning 9 oyi yakunlari bo‘yicha aholi daromadlari real hisobda 10,4 foizga oshgan.
Markaziy bank boshqaruvi raisining maʼruzasi davomida keltirlgan raqamlarni quyidagicha izohlaydi:
“Iqtisodiyotning barcha sohalarida ham bir хil yuqori tiklanish surʼatlari kuzatilmayapti. Ichki va tashqi turizm, yo‘lovchi tashish, avtomobil ishlab chiqarish umumiy ovqatlanish sohalari hali ham 2019 yil darajasiga yetgani yo‘q. Istiqbolda ushbu sohalarda ham shu sohadagi jarayonlarning to‘liq tiklanishi yuqori iqtisodiy o‘sish ko‘rsatkichlarini qo‘llab-quvvatlovchi omil bo‘ladi”.
Eslatib o‘tamiz, bundan avval Senat ayrim oziq-ovqat mahsulotlari qo‘shilgan qiymat solig‘idan ozod qilish haqidagi qonnuni maʼqullagani hamda O‘zbekistonning iqtisodiy ko‘rsatkichi 10 foizga oshgani haqida xabar berilgandi.
Cho‘lponoy Ahmedova
