Sharh: Farzandlikka olish bilan bog‘liq cheklovlar aniq belgilandi
"Farzandlikka olish tartibining huquqiy asoslari takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida"gi qonun imzolandi.
Endi farzandlikka olishni istisno qiluvchi jihatlar yana-da aniq belgilandi. Shu bilan birga kimlar “farzand asrab olish” huquqiga ega emasligi ham tasdiqlandi.
Jumladan, hayotga, sog‘liqqa, jinsiy erkinlikka, oilaga qarshi xatti-harakatlarni amalga oshirgan fuqarolar bunday huquqdan foydalana olmaydi. Shuningdek, o‘zganing mol-mulkini talon-taroj qilish, giyohvandlik vositalari bilan bog‘liq va yana shunga o‘xshash bir qator jinoyatlarni qasddan sodir etgan shaxslar ham farzandlikka olish huquqiga ega emas.
Ilgari har qanday jinoyatni qasddan sodir etgan shaxs bola asrab olish huquqidan mahrum qilingan edi.
Inchinun bola sog‘ligiga xavf tug‘diradigan kasalligi bor shaxslar ham farzandlikka olish huquqiga ega emas.
Farzandlikka olish shaxsning arizasiga, vasiylik va homiylik organlari tavsiyasiga ko‘ra amalga oshiriladi. Bunda mazkur tartib fuqarolik ishlari bo‘yicha sud qarori bilan amalga oshiriladi.
Bundan avval endi jazo muddatini o‘taganlar ham farzand asrab olishlari mumkinligi hamda "Mehr daftari" tizimi va unga kimlar kiritilishi haqida xabar berilgan edi.
Olamgir Abdiyev
