Xalqaro media-xollda “Adolat” SDP brifing o‘tkazdi
Bugun, 22 oktyabr kuni Xalqaro media-xollda “Adolat” SDPning O‘zbekiston Respublikasi Prezidenti sayloviga tayyorgarlik jarayonlari va amalga oshirilgan ishlar xususida brifing bo‘lib o‘tdi. Unda partiyaning markaziy saylov shtabi aʼzolari, hududiy shtablardan vakillar, partiya faollari, ommaviy axborot vositalari xodimlari ishtirok etdi. Partiya rahbariyati saylov kampaniyasi davrida tashkil etilgan tadbirlar haqida hisobot berdi.
Taʼkidlanishicha, Saylov kampaniyasi davrida “Adolat” SDP aholi siyosiy va huquqiy savodxonligini yana-da oshirish, elektorat manfaatlarini himoya qilishga yana-da faolroq kirishdi. 350 dan ortiq saylovoldi targ‘ibot-tashviqot tadbirlar tashkil etildi. Ushbu tadbirlarda yuz mingga yaqin yoshlar va xotin-qizlar qamrab olinishiga erishildi.
Shuningdek, keng jamoatchilik bilan “qayta aloqa” mexanizmini o‘rnatish tizimi yo‘lga qo‘yildi. Partiya telegram kanalida aholi bilan aloqa qilish maqsadida “Muhokamalar bo‘limi” ochildi. Bu orqali saylovchilar bilan jonli muloqotni yo‘lga qo‘yish, odamlarni qiynab kelayotgan masalalarni chuqurroq o‘rganish maqsad qilingan.
Saylov kampaniyasi davrida partiya tomonidan televideniyada 700 dan ortiq, radiokanallarda 450 dan ko‘proq, bosma OAVda 200 dan ko‘proq, veb- saytlarda 500 marotaba va ijtimoiy tarmoqlarda 4000 dan ortiq chiqishlar qilingani maʼlum qilindi.
Bundan avval yaponiyalik kuzatuvchining saylov haqidagi fikrlari hamda Xalqaro media-xollda O‘zbek tili bayrami o‘tkazilgani xabar qilingandi.
Jahongir Qo'ziyev
