Naberejniye Chelnida ko‘p qavatli uyda gaz portlashi oqibatida uyning tepa qismi qulab tushdi
Qutqaruvchilar bir soat ichida beton qoldiqlari orasidan tirik qolgan to‘rt nafar, jumladan, ikki yosh bolani olib chiqdi.
Kecha tunda Naberejniye Chelnida 5 qavatli uyning 4 chi qavatida kuchli gaz portlagan. Natijada uyning beshinchi qavati qulab tushgan: oltita xonadon vayron bo‘lgan.
Favqulodda Vaziyatlar Vazirligining Respublika bosh boshqarmasi matbuot xizmati rahbari Андрей Rodiginning maʼlum qilishicha, xabar 17:30 da kelib tushgan. Voqea joyiga 5 daqiqada tez yordam va qutqaruv brigadasi yetib kelgan.
Bir soat ichida beton qoldiqlari orasidan 4 nafar odam qutqarilib yaqin atrofdagi shifoxonalarga zudlik bilan yotqizilgan. Hozirda jonlantirish bo‘limida hayoti uchun kurashishmoqda.
Portlash sodir bo‘lgan uyning birinchi qavatida yashovchi Go‘zalning aytishicha, u o‘sha vaqt uyda bo‘lgan.
—To‘satdan men kuchli portlash ovozini eshitdim, hamma joy yer silkinganidek bo‘ldi, oynalarim sinib ketdi. Avvaliga tushunmadim so‘ng ko‘chaga bolalarim bilan otilib chiqdim ,—deydi u.
Guvohlarning aytishicha, portlash shu darajada kuchli bo‘lganidan hatto oyna va beton bo‘laklari yuzlab metr olisga uchib ketgan. Bino yo‘l yoqasida bo‘lgani uchun beton bo‘laklari sfetoforda to‘xtagan mashina oynalariga ham ziyon yetkazgan.
Hozirda surishtiruv ishlari davom etmoqda.
Avvalroq,Navoiyda gaz quyish shaxobchasi portlagani hamda Namanganda masjid qurilishi paytida qo‘shni uy darvozaxonasining tom qismi qulab tushgani haqida xabar berilgandi.
Munojat Valiyeva
