Наманганда масжид қурилиши пайтида қўшни уй дарвозахонасининг том қисми қулаб тушди
Наманган шаҳридаги “Заркент” маҳалла фуқаролар йиғини “Ахси” кўчасида жойлашган “Ҳомиддин қори” жомеъ-масжиди учун таҳоратхона қурилиши жараёнида кутилмаган кўнгилсиз воқеа юз берди.
Наманган вилояти Фавқулодда вазиятлар бошқармаси ахборот хизмати раҳбари Қаҳрамон Сатторовнинг маълум қилишича, 2021 йил 29 август соат 18:45-19:00лар чамасида девор ўпирилиши содир бўлганлиги сабабли, унинг ёнидаги 19-берк, 21-“а” уйдаги дарвозахонанинг ён девори ҳам ўпирилди. Бунинг оқибатида дарвозахонанинг том қисми қулаб тушган.
Ҳозирда воқеа жойида Наманган вилояти Фавқулодда вазиятлар бошқармаси Қутқарув отряди ва шаҳар ФВБ ёнғин-қутқарув бўлими қутқарувчилари томонидан қидирув-қутқарув ишлари олиб борилмоқда.
ФВБ қутқарув отряди мутахассислари томонидан мазкур ҳодисанинг содир бўлиши туфайли фуқароларга жиддий тан жароҳати етмагани айтилмоқда.
Аввалроқ, Абдуллахон II мадрасасининг бир қисми ўпирилиб тушганлиги ҳақида хабар берган эдик.
