Syurix (Shveysariya) klinikasi kardiologlari O‘zbekistonda jarrohlik amaliyotlarini olib boradi
8-17 noyabr kunlari shveysariyalik shifokorlar bemorlarni tibbiy ko‘rikdan o‘tkazadi.
Bugun O‘zbekistonga Syurix (Shveysariya) klinikasining yurakni davolash va jarrohlikka ixtisoslashgan shifokorlar guruhi keladi.
“Dunyo” axborot agentligi xabariga ko‘ra, 8-17 noyabr kunlari shveysariyalik shifokorlar bemorlarni tibbiy ko‘rikdan o‘tkazadi. Tug‘ma yurak nuqsonlari bo‘lgan kishilarni operatsiya qiladi, aortokoronar va miniinvaziv jarrohlik amaliyotlarini olib boradi.
Qayd etilishicha, ular tomonidan o‘zbekistonlik hamkasblari uchun intervension kardiologiyaning zamonaviy usullaridan foydalanish bo‘yicha treninglar va mahorat darslarini o‘tkazish rejalashtirilgan.
Maʼlumot uchun: EAH 2006 yil Syurix shahrida tashkil etilgan. Jamg‘armaning asosiy faoliyati yurak-qon tomir kasalliklari sohasida malakali tibbiy yordam ko‘rsatish va tibbiyot xodimlarini tayyorlashga ko‘maklashishdan iborat.
Avvalroq murakkab operatsiyalar narxi O‘zbekistonda 10 barobar arzonligi, Surxondaryoda tug‘ma yurak nuqsoni bor bolalarda jarrohlik amaliyoti o‘tkazilishi hamda O‘zbekistonda yiliga 50 ta yurak ko‘chirib o‘tkazilishi haqida xabar berilgandi.
