Rossiyada MMA ustasi qo‘lga olindi
Sportchi pankration bo‘yicha Rossiya chempioni hisoblanadi.
Rossiyaning Vnukovo aeroportida aralash janglar ustasi Salmon Jamaldayev qo‘lga olindi. Uning yonidan giyohvand modda topildi. Bu haqda "Ren-TV" xabar berdi.
Xabarga ko‘ra, sportchi Grozniy shahriga uchib ketmoqchi bo‘lgan. Uning yonidan narkotik moddalar topilgani uchun qo‘lga olingan. Hozirda surishtiruv ishlari olib borilmoqda. Advokati ham tez orada yetib kelishi maʼlum qilingan. Qonun himoyachilari Moskva shahrida 11-sinf o‘quvchisidan bir paket narkotik modda topilganidan keyin Jamaldayev haqida bilishgan.
Salmon Jamaldayev pankration bo‘yicha Rossiya chempioni hisoblanadi. Shuningdek, erkin va yunon-rum kurashi bo‘yicha sport ustasi hisoblanadi. Oldinroq sportchi yarim yengil vaznda WFCA va ACA chempioni bo‘lgan.
Avvalroq, Qashqadaryoda 9 yoshli sportchi to‘pponchadan o‘q yegani hamda Habib Nurmagomedov Rossiyalik sportchilardan norozi bo‘lgani haqida xabar berilgandi.
Munojat Valiyeva
