Ҳатто, мазкур жиноят иши назорати мутасадди ташкилот раҳбарлари зиммасига юклатилди. Жиноят жазосиз қолмайди. Аммо халқ икки забардаст спортчисидан айрилди.

 

Навбатдаги жиноят ҳам айнан спортчилар билан боғлиқ.

 

Қаршида бир гуруҳ ёшлар ўртасида оммавий жанжал юз берди. Иштирокчилардан бири 19 ёшли спортчини пневматик тўппончадан ўқ узиб, яралади. Бу ҳақда “Новости Кашкадари” хабар берди.

 

Унда келтирилишича, жанжал 3 сентябрь куни соат 21:30 да Қарши марказида курант ва вилоят ҳокимлиги биноси яқинида юз берган. Муқаддам судланган 28 ёшли Шаҳриёр ва унинг дўстлари бир гуруҳ йигитлар билан жанжаллашиб қолган. Шаҳриёр улардан бирига пневматик тўппонча билан ўқталиб, 3 сония ичида дўстлари билан йўлнинг нариги томонига ўтишни буюрган.

 

Шундан сўнг жами 11 кишидан иборат йигитлар гуруҳи ўртасида жанжал бошланган. Улар кўчада бир-бирларини турли уятли сўзлар билан ҳақолатлаган. Шу вақтда Шаҳриёр қочишга тушиб, биринчи дуч келган таксини тўхтатган. Куч ишлатиб ҳайдовчини машинадан тушишга мажбур қилган. Шу пайт машинага 19 ёшли спортчи Жонибек югуриб келган. Шаҳриёр унга бир неча марта пневматик тўппончадан ўқ узган. Икки марта қорин соҳасидан яраланган Жонибек ҳам ўз навбатида Шаҳриёрни урган.

 

“Воқеа жойига профилактика инспектори келиб қолмаганида бу можаро қандай якун топган бўларди, номаълум. Жанжал иштирокчиларининг аксарияти Қашқадарё олийгоҳларида ўқиётган талабалар, айримлари ўқишга энди кирган йигитлар бўлган. Уларнинг деярли барчаси спорт билан шуғулланади. Ораларида Ўзбекистон чемпиони ҳам бор. Нима учун жанжалда иштирок этдингиз, деган саволга улар дўстини хафа қилишганида қараб туролмаслигини билдирган”, - дейилади хабарда.

 

Ҳуқуқни муҳофаза қилиш органлари ходимлари барча ҳолатларни инобатга олган ҳолда, 9 иштирокчига нисбатан Маъмурий жавобгарлик тўғрисидаги кодекснинг 183-моддаси (майда безорилик) бўйича маъмурий жазо қўллашга қарор қилди. Уларни БҲМнинг 3 бараваридан 5 бараваригача миқдорида жарима ёки 15 кунлик қамоқ жазоси кутмоқда.

 

28 ёшли Шаҳриёрга нисбатан эса Жиноят кодексининг 277-моддаси 2-қисми “в” банди (совуқ қуролни намойиш қилиб, уларни қўллаш билан қўрқитиб ёхуд қўллаб безорилик қилиш) билан жиноят иши қўзғатилиб, қамоққа олинган.

 

Эслатиб ўтамиз, аввалроқ Қашқадарёда эркак танишининг кўзига пневматик пистолетда отиб қўйганди. Шунингдек, Сурхондарёда сабабсиз “KAMAZ”га қарата ўқ узган “Malibu” ҳайдовчиси қўлган олингани ҳақида хабар берилганди.

 

 

Баҳринисо Мадумарова