Samarqand UNWTO Bosh Assambleyasini o‘tkazish uchun nomzod sifatida ko‘rsatildi
Sessiya doirasida Madrid shahrida O‘zbekiston delegatsiya tomonidan "O‘zbekiston madaniyati bilan tanishish" rasmiy qabuli tashkil etiladi.
O‘zbekiston 1993-yildan buyon UNWTOning to‘laqonli aʼzosi bo‘lib, 1994-yilda Buyuk ipak yo‘li bo‘ylab turizmni rivojlantirish xalqaro loyihasida ishtirok etuvchi davlatlarning Samarqand deklaratsiyasi qabul qilingan edi. 2011-yilda esa O‘zbekiston BMT Jahon sayyohlik tashkiloti Ijroiya kengashi aʼzosi etib saylandi.
2020-yil iyun oyida O‘zbekiston 2023-yilda Samarqand shahrida UNWTO Bosh Assambleyasini o‘tkazish uchun ariza topshirgan. Joriy yil 30 noyabr – 3 dekabr kunlari Madrid shahrida bo‘lib o‘tadigan UNWTO Bosh Assambleyaning 24-sessiyasi o‘tkaziladi. Unda O‘zbekiston delegatsiyasi qatnashadi.
Qayd etilishicha, mazkur sessiyada 2023-yilda UNWTO Bosh Assambleyasining 25-sessiyasi o‘tkaziladigan shahar nomi ham tanlanadi.
Taʼkidlanishicha, tadbirda UNWTO Bosh Assambleyasining 24-sessiyasi mehmonlari va ishtirokchilari O‘zbekistonning xalq amaliy sanʼati mahsulotlari bilan tanishishlari, milliy taomlardan tatib ko‘rishlari, hamda milliy folklor jamoalarining chiqishlarini tomosha qilishlari mumkin bo‘ladi.
Avvalroq O‘zbekistonning sayyohlik salohiyati Belgiya jamoatchiligi diqqat markazida bo‘lgani, O‘zbekistonda barcha turdagi mehmonxonalarga sertifikat berish muddati 15 kunga qisqargani hamda Qo‘qon Turkiy kengashning ilk turizm poytaxti deb eʼlon qilingani haqida xabar berilgandi.
