Қўқон Туркий кенгашнинг илк туризм пойтахти деб эълон қилинди
Қўқондаги Жоме мажмуасида ташкил этилган тадбирда Туркий тилли давлатлар ҳамкорлик кенгаши (Туркий кенгаш) бош котиби Боғдод Амреев, Туркия, Қозоғистон, Қирғизистон, Озарбойжон ва Ўзбекистондан туризм соҳасига масъул вазирлар иштирок этмоқда.
Бугун, 24 июн куни Туркий кенгаш туризм масалалари вазирларининг VI йиғилишида иштирок этиш учун келган меҳмонлар Қўқон шаҳрида тантанали кутиб олинди.
Қўқондаги Жоме мажмуасида ташкил этилган тадбирда Туркий тилли давлатлар ҳамкорлик кенгаши (Туркий кенгаш) бош котиби Боғдод Амреев, Туркия, Қозоғистон, Қирғизистон, Озарбойжон ва Ўзбекистондан туризм соҳасига масъул вазирлар иштирок этмоқда.
Ўзбекистон бош вазири ўринбосари Азиз Абдуҳакимов йиғилишда қатор таклифларни илгари сурди. Транспорт логистикасини ривожлантириш, маданий мерос объектларини асраш жамғармасини ташкил этиш, туркий давлатлар ягона маданий ва туризм тадбирлари тақвимини тузиш, Бобурийлар сулоласи ҳукмронлик қилган қадимги Ахсикент қалъаси ҳудудида “Туркий овоз” қўшиқ ва куй фестивалини ташкил этиш таклифлари шулар жумласидан.
Йиғилишда Ипак йўли равнақига муҳим ҳисса қўшган Қўқон шаҳрини Туркий кенгашнинг илк туризм пойтахти сифатида қўллаб-қувватлаш таклифи ҳам илгари сурилди. Йиғилиш иштирокчилари буни маъқуллади ва Қўқон шаҳри Туркий кенгашнинг илк туризм пойтахти дея эълон қилинди.
