YеI Polsha chegarasida turgan migrantlarga 700 ming yevro ajratdi
Bu mablag‘ eng zaruriy mahsulotlarni sotib olishga sarflanadi.
Yevropa Ittifoqi Polsha-Belarus chegarasidagi qochqinlarga 700 ming yevro miqdorida yordam ajratdi. Bu haqda Yevropa Komissiyasi bayonotida so‘z boradi.
“YеI odamlar mashaqqatini kamaytirish maqsadida o‘z hamkorlarining gumanitar yordam berishini qo‘llab-quvvatlaydi. Har ikki tomondagi gumanitar tashkilotlarning migrantlarning katta qismiga yordam berishi uchun doimiy sharoit yaratib berilishiga chaqiraman”, –– degan Yevrokomissar Yanez Lenarchich.
Qayd etilishicha, 700 ming yevro Xalqaro Qizil Xoch qo‘mitasi orqali kelib tushadi. Bu mablag' oziq-ovqat mahsulotlari, dori-darmon va gigiyena vositalari sotib olishga sarflanadi.
Maʼlumot o‘rnida: 8 noyabr kuni Belarusdan Polsha yo‘nalishiga qarab minglab migrantlar yo‘lga chiqqan. Buning ortidan chegaraga qo‘shimcha politsiya va harbiy kuchlar chaqirilgan. Polsha va Boltiqbo‘yi davlatlari Belarusni vaziyatni atayin chigallashtirishda ayblamoqda. Hozir Litva chegara hududlarda favqulodda holat joriy etgan.
Avvalroq Polshada suriyalik erkakning jasadi topilgani hamda Polsha chegaraga 10 ming askar joylashtirgani haqida xabar qilingandi.
Jahongir Qo'ziyev
