Беларусь-Польша чегарасида вазият кескинлашмоқда
Минск Польша чегарага 10 минг аскар жойлаштирганини маълум қилган.
Беларусь мудофаа вазирлиги Польша билан чегарадаги вазият юзасидан баёнот берди. Бу ҳақда «РИА Новости» хабар берди.
Мудофаа вазирлиги хабарига кўра, Польша Беларусь билан чегарага 10 минг аскар жойлаштирган. Минск буни ҳарбий ҳаракат сифатида баҳоламоқда ва Варшава бу ҳақда ҳеч қандай маълумот тақдим этмаганини маълум қилди. Шунингдек, вазирлик Польшани конструктив мулоқотга тайёр эмаслигини айтган ва чегарадаги вазиятни атайин сиёсийлаштиришда айблаган.
Маълумот ўрнида: 8 ноябрь куни Беларусдан Польша йўналишига қараб минглаб мигрантлар йўлга чиққан. Бунинг ортидан чегарага қўшимча полиция ва ҳарбий кучлар чақирилган. Польша ва Болтиқбўйи давлатлари Беларусни вазиятни атайин чигаллаштиришда айбламоқда. Ҳозир Литва чегара ҳудудларда фавқулодда ҳолат жорий этган.
Аввалроқ Польша бош вазири Путин ва Лукашенкони "миграцион шантаж"да айблагани ҳамда Лукашенко Польшани огоҳлантиргани ҳақида хабар қилинганди.
Жаҳонгир Қўзиев
