O‘zbekistonda pensiya va nafaqa oluvchilar soni 4 million kishidan oshdi

 

Moliya vazirligi huzuridagi byudjetdan tashqari Pensiya jamg‘armasi xabariga ko‘ra, 2021-yil 1-yanvar holatiga nisbatan yoshga doir pensiya oluvchilar soni 117,7 ming nafar kishi (4,1%) ga, nogironlik pensiya oluvchilar soni 11,0 ming nafar kishi (2,9%) ga, boquvchisini yo‘qotganlik pensiya oluvchi oilalar soni 9,6 ming oila (5,1%) ga va nafaqa oluvchilar soni 40,2 ming nafar kishi (10,0%) ga ortdi.

 

Shundan, 2 966,7 ming nafari (74,1%) ni yoshga doir pensiya (bundan, 1 898,1 ming nafari yoki 64 foizi ayollar), 397,6 ming nafari (9,9%) ni nogironlik pensiya (bundan, 163,5 ming nafari yoki 41,1 foizi ayollar), 198,6 ming nafari (5,0%) ni boquvchisini yo‘qotganlik pensiya oluvchi oilalar va 440,8 ming nafari (11,0%) ni nafaqa oluvchilar tashkil qildi (bundan, 208,3 ming nafari yoki 47,3 foizi ayollar).

 

Xususan, 2021-yilning yanvar-oktabr oylarida 327,5 ming nafar (bundan, 161,5 ming nafari yoki 49,3 foizi ayollar) fuqarolarga yangi pensiya va nafaqalar tayinlandi (shundan, 215,1 ming nafari (65,7%) ga yoshga doir pensiya, 29,9 ming nafari (9,1%) ga nogiron shaxs sifatida pensiya, 19,6 ming oila (6,0%) ga boquvchisini yo‘qotganlik pensiya va 62,9 ming nafari (19,2%) ga nafaqalar tayinlandi).

 

Qayd etilishicha, hududiy tuman (shahar) bo‘limlarida hisobga olingan pensiya va nafaqa oluvchilarning umumiy soni 2021-yil 1-noyabr holatiga 4 003,8 ming nafarni (bundan, 2 269,9 ming nafari (56,7 foizi) ayollar) yoki aholi sonidagi ulushi 11,5% ni tashkil qilgan holda 2021-yil 1-yanvar holatiga nisbatan 178,6 ming nafar (4,7%) ga ko‘paydi.

 

Eslatib o‘tamiz, avvalroq O‘zbekistonda boquvchisini yo‘qotganlik pensiyasi yoshi 5 yilga uzaytirilgani, oktyabr oyida pensiya va nafaqalar qay tartibda berilishi maʼlum qilingani, pensiya va nafaqalar qanday hollarda tekshirilmasligi hamda endilikda pensiya hisob-varag‘ida qancha mablag‘ yig‘ilganini bilish mumkinligi haqida xabar berilgandi.