Afg‘on bolalari ochlikdan halok bo‘lishi mumkin
1 milliondan ortiq bola ochlik yoqasida. 3,2 million bola esa jiddiy darajada to‘yib ovqatlanmaydi.
Bu haqda YUNISEFning Afg‘onistondagi aloqalar bo‘limi rahbari Samanta Mort maʼlum qildi.
"Bugungi kunda mamlakat bo‘ylab taxminan 22,8 million odam oziq-ovqat taʼminotidan mahrum. Afg‘on bolalari to‘yib ovqatlanmaslik tufayli turli kasalliklarga chalinmoqda. Odamlar qanday qilib ochlikdan omon qolish haqidagina o‘ylamoqda”, — deydi Mort.
YUNICEF vakili qishning sovuq oylari yaqinlashayotgani va qor ko‘plab tog‘li qishloq hududlarini to‘sib qo‘yishi vaziyatni yana-da og‘irlashishi haqida ogohlantirdi. Unga ko‘ra, bu qishdan ko‘pchilik afg‘onlar, ayniqsa, bolalar omon chiqmasligi mumkin.
BMT Bosh kotibining gumanitar masalalar bo‘yicha o‘rinbosari Martin Griffits G20 davlatlari rahbarlariga Afg‘onistonda ommaviy ocharchilikning oldini olishni so‘rab murojaat qildi.
Avvalroq Jahon sog‘liqni saqlash tashkiloti Belarus-Polsha chegarasidagi Bruzgi logistika markaziga noqonuniy muhojirlar uchun gumanitar yordamning birinchi partiyasini yetkazgani haqida xabar berilgandi. Shuningdek, YUNICEF qancha afg‘on bolalari ochlikka duchor bo‘lganini maʼlum qilgandi.
Nasiba To‘xtayeva
