Ҳозирга келиб 1.5 миллион бола очликка дучор бўлган. UNICEF мамлакатда тўйиб овқатланмаслик билан боғлиқ касалликлар авж олишидан огоҳлантирмоқда.
“Ҳозирги кунда бутун Афғонистонда миллионлаб болалар озиқ-овқат ва тиббий хизматга муҳтож. Мамлакат бўйлаб жами 14 миллион киши тўйиб овқатланмаяпти, шулардан 3.5 миллиони болалар”, – деган ташкилотнинг Афғонистондаги коммуникациялар бўйича мутахассиси Салом ал-Жанобий.
Унинг қўшимча қилишича, UNICEF ва БМТ Бутунжаҳон озиқ-овқат дастури сўнгги икки ойда бор қуввати билан ишлаётганини айтган. Бунинг натижасида ҳозиргача 40 минг бола тўйиб овқатланмаслик оқибатида келиб чиққан касалликлардан муолажа қилинган.
Индира Ганди номидаги болалар шифохонаси Афғонистонда кўплаб клиникалар дори-дармон етишмаслиги оқибатида ёпилганини маълум қилган. Ушбу шифохона бошлиғи Муҳаммад Латиф Боҳирнинг таъкидлашича, Афғонистон соғлиқни сақлаш тизимига халқаро ёрдам кескин камайган.
Бундан аввал Кобулда янги портлаш, Жалолободда отишма содир бўлгани хабар қилинганди.
Жаҳонгир Қўзиев