“Yerfurush” ko‘zlagan maqsadiga yetolmadi
Firibgarlar ashyoviy dalillar bilan ushlangan.
Beruniy tumanida fuqaro G.S. fuqaro X.ning aldov yo‘li bilan ishonchiga kirib, unga 10 000 AQSH dollari evaziga M. fermer xo‘jaligiga qarashli 5 gektar hamda J. fermer xo‘jaligiga qarashli 1 gektar yer maydonini olib berishini vaʼda qilgan. G.S., X.ning ishni tezroq hal etish uchun oldindan 5 000 AQSH dollarini olgan vaqtida ashyoviy dalillar bilan ushlangan.
Shu kuni o‘xshash yana bir holat aniqlangan. Bo‘ston tumanida, Bo‘ston o‘rmon uchastkasi o‘rmonchisi R.O‘. fuqaro D.ga tanishlari yordamida o‘rmon xo‘jaligi hududidan 1 gektar yer maydonini 4 000 AQSH dollari evaziga maishiy xizmat ko‘rsatish maskani barpo etish uchun ajratib berishga kelishgan. 3 500 AQSH dollarini oldindan to‘lov sifatida olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Xorazmda noqonuniy yer sotayotgan shaxslar ushlangani hamda Bo‘stonliq tumanida 5 gektar yerni 150 ming AQSH dollarga olib berishni vaʼda qilgan shaxs qo‘lga olingani haqida xabar berilgandi.
Munojat Valiyeva
