ДХХ ахборот хизмати хабарига кўра, Хоразм вилояти Фавқулодда вазиятлар бошқармаси ходими маҳаллий фуқаро билан келишиб, Урганч туманидаги ташкилот балансида бўлган 30 сотих ер майдонини бошқа шахс номига танишлари орқали расмийлаштириб бериш эвазига 50 минг АҚШ доллари талаб қилади.
Қайд этилишича, ДХХ Хоразм вилояти бўйича бошқармаси ва Бош прокуратура ҳузуридаги департаментнинг ҳудудий бошқармаси ходимлари томонидан тезкор тадбир ўтказилди. Улар сўралган пулдан 30 минг АҚШ долларини олган вақтларида қўлга олинган.
Хоразмда кузатилган яна бир ҳолатда эса Хива шаҳрида яшовчи, 1984 йилда туғилган фуқаро тадбиркорлик билан шуғулланмоқчи бўлган шахсга Урганч шаҳри ҳудудидан 2 сотих ер майдони олиб бериш учун 30 минг АҚШ доллари талаб қилгани аниқланди.
Таъкидланишича, олдиндан 20 минг доллар олган вақтида ушланди.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Эслатиб ўтамиз, Тошкент вилоятида 106 гектар ер майдонида 516 та ҳолатда қонунбузилиш ҳолатлари бартараф этилганди.
Аввалроқ Сирдарёда ноқонуний ердан фойдаланиб, иморат тиклаган фуқарога огоҳлантиришдан сўнг чора кўрилгани, Жарқўрғон туманида захирадаги ерни сотмоқчи бўлган фирибгар ушлангани, Фарғонада "аукцион" орқали арзон ер майдони олиб бераман деб 60 миллион сўмни қўлга киритган шахс қўлга олингани ҳамда ДХХ томонидан ноқонуний ер сотиш ҳолатларининг олди олингани ҳақида хабар берилганди.