Qurayshiy: Agar xalqaro hamjamiyat Tolibon bilan aloqa qilmasa, Afg‘oniston beqarorlikka qarab ketadi
Pokiston Tashqi ishlar vaziri Shoh Mahmud Qurayshiyning “Amerika Ovozi”ga aytishicha, Pokiston xalqaro hamjamiyatni Afg‘onistonni tark etmaslikka ko‘ndirmoqda.
Rasmiyning taʼkidiga ko‘ra, xalqaro hamjamiyat Tolibon bilan aloqa qilmasa, mamlakat beqarorlik tomon yuradi. Bu esa terrorchi guruhlar uchun maydon hozirlaydi.
Maʼlumotlarga ko‘ra, Islom hamkorlik tashkiloti tashqi ishlar vazirlari yig‘ilishida Afg‘oniston masalasi ko‘tarilgan. Bunda tashkilotga aʼzo davlatlardan tashqari, Xavfsizlik kengashining doimiy aʼzolarining maxsus vakillari ham ishtirok etgan. Qurayshiyning maʼlum qilishicha, yig‘ilishga Afg‘oniston ham taklif qilingan.
"Tolibon hukumati xalqaro hamjamiyatning qo‘llab-quvvatlashiga erishish uchun yetarlicha saʼy-harakatlar qildi, biroq dunyo mamlakatlari Tolibon hukumati bilan hamkorlik qilish uchun shartlar qo‘ymoqda”, - deydi Pokiston Tashqi ishlar vaziri Shoh Mahmid Qurayshiy.
Avvalroq Buyuk Britaniya afg‘on qochqinlari uchun 40 million dollardan ortiq yordam ajratgani hamda Afg‘oniston chuqur gumanitar inqiroz yoqasida turgani haqida xabar berilgandi.
Olamgir Abdiyev
