Turkmaniston IHTning Afg‘oniston bo‘yicha sammitida ishtirok etadi
Mazkur sammitga taklif etilgan “Tolibon” delegatsiyasiga tashqi ishlar vaziri Amir Xon Muttaki boshchilik qiladi.
Turkmanistonning rasmiy xabariga ko‘ra, prezident Gurbanguli Berdimuhamedov hukumat yig‘ilishida videoaloqa orqali tegishli farmoyishni imzolagan va Turkmaniston afg‘onlarga yordam berishda davom etishini bildirgan.
Jumladan, Afg‘oniston va mintaqaning ijtimoiy-iqtisodiy rivojlanishiga hissa qo‘shadigan yangi qo‘shma loyihalarni amalga oshirishini ham taʼkidlagan.
Turkmaniston delegatsiyasi 18-20 dekabr kunlari Islomobodda bo‘ladi. Dastlab Saudiya Arabistoni Afg‘oniston masalalari bo‘yicha Islom hamkorlik tashkilotining (Rossiya kuzatuvchi maqomiga ega) navbatdan tashqari sammitini o‘tkazish tashabbusi bilan chiqdi.
Bundan tashqari, IHT sammiti doirasida “kengaytirilgan uchlik” davlatlarining Afg‘oniston bo‘yicha maxsus elchilarining uchrashuvi ham bo‘lib o‘tadi.
Eslatib o‘tamiz, avvalroq "Tolibon" G‘arb davlatlaridan sanksiyalarni bekor qilishni so‘ragani hamda O‘zbekiston Qatarda "Tolibon" harakati bilan muzokara o‘tkazgani haqida xabar berilgandi.
Cho‘lponoy Ahmedova
