"Толибон" Ғарб давлатларидан санкцияларни бекор қилишни сўради
"Толибон" ҳукумати ташқи ишлар вазири Амирхон Мутаққий Ғарб давлатларидан санкцияларни бекор қилишни сўради. Мутаққий бу ҳақда Доҳада, АҚШ ва Европа Иттифоқи вакиллари билан учрашувда айтиб ўтган.
"Толибон" бош дипломатининг фикрича, амалдаги афғон ҳукуматининг заифлашувидан АҚШ ва Европа ҳам манфаатдор эмас. Сабаби бу хавфсизлик ва миграция билан боғлиқ вазиятни янада кескинлаштиради. Шунингдек, санкцияларни бекор қилиш орқали Афғонистон банк тизими фаолияти ва давлат хизматчиларига маош тўлашни тиклаши мумкин.
"Толибон"нинг яна бир вакили, ахборот ва маданият вазири вазифасини бажарувчи Хайрулла Хайрхва ҳам АҚШни ҳаракат раҳбариятига нисбатан жорий қилинган санкцияларни бекор қилишга чақирди. "Америка "Толибон" раҳбариятини террорчилар рўйхатига киритиш тўғрисидаги нуқтайи назарини қайта кўриб чиқиши керак. Улар шу орқали Афғонистон ҳукуматига босим ўтказмоқда. Биз дипломатик услублардан фойдаланишни сўраймиз, сабаби босим билан ҳеч нарсага эришиб бўлмайди", — деган вазир.
Хайрхва "Толибон" барча мажбуриятларини бажариб бўлганини, аммо халқаро ҳамжамият бу борада қадам ташламаганини маълум қилган. Шунингдек, Афғонистон ҳудудида ИШИД таҳдиди мавжуд эмаслиги таъкидланган.
Бундан аввал "Толибон" расмий вакили Забиҳулло Мужоҳид НАТОни дипломатик тилда мулоқот қилишга чақирганди. Шунингдек, Озарбайжон президенти толиблар ҳукуматини энг аввало Афғонистон қўшнилари тан олиши лозимлигини айтганди.
Жаҳонгир Қўзиев
