Ehtiyot bo‘ling! Endi tangalar qalbakilashtirilmoqda
Toshkent shahrida katta miqdordagi soxta pullar aniqlandi.
Poytaxtda bank xodimlari kechki inkassatsiya va ekspertizani o’tkazish jarayonida 2 yevrolik 2 470 dona jami 4 940 yevro qiymatidagi qalbaki tangalarni aniqlashdi. Bu haqda Toshkent shahar IIBB matbuot xizmati xabar qildi.
O’tkazilgan tezkor-qidiruv tadbirlari natijasida ushbu jinoyatni 41 yoshli M.B. ismli shaxs sodir etganligi ma’lum bo‘ldi. U qalbaki tangalarni 31 yoshli J. M. dan xarid qilgan va 59 280 000 soʻmga valyuta operatsiyalarini amalga oshirgan.
Hozirda mazkur holat yuzasidan Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurash departamenti tomonidan Jinoyat kodeksining 176-moddasi 2-qismi bilan (“Qalbaki pul, aksiz markasi yoki qimmatli qogʻozlar yasash, ularni oʻtkazish”) jinoyat ishi qoʻzgʻatildi.
176-moddaga ko’ra, ushbu jinoyat uchun besh yildan oʻn yilgacha ozodlikdan mahrum etish nazarda tutilgan.
Avvalroq Yangiyo’l shahrida soxta pul tayyorlagan shaxslar ushlangani va qalbaki dollarga telefon sotib olgan firibgarning qo’lga olingani xabar qilingandi.
Javohirbek Tursunov
