Сохта долларга телефон сотиб олган фирибгар ушланди
Тошкент шаҳар Учтепа туманида истиқомат қилувчи икки нафар фуқаро ўзаро тил бириктириб фирибгарлик йўли билан пул топишни мақсад қилди.
2021 йил 6 август куни Тошкент вилояти Зангиота туманида яшовчи фуқародан iPhone 12 Pro русумли телефон аппаратини 1.200 долларга сотиб олди. Лекин фирибгарлар телефон эгасига берган валюталар қалбаки экани маълум бўлди. Жабрланувчи дарров ички ишлар органига мурожаат қилди.
Олиб борилган тезкор суриштирув ишлари натижасида фирибгарлардан бири Қ.Аисмли фуқаро эканлиги аниқланиб, Шайхонтоҳур туманида жойлашган “Малика” савдо мажмуасида қўлга олинди. Унинг ёнида Юнусжоновга тегишли бўлган iPhone 12 Pro русумли телефон аппарати ҳамда 5 минг қалбаки АҚШ доллари борлиги аниқланди. Текширув давомида гумондор Қ.А Тошкент шаҳар ИИББ томонидан қидирувга берилган шахс бўлиб чиқди. Гумонланувчи билан олиб борилган суриштирув натижасида унинг аввал содир этилган бир нечта жиноятларда ҳам қўли борлиги аниқланди. Уларнинг учтаси валюта билан, учтаси фирибгарлик билан боғлиқ.
Гумондор Қ.А қалбаки валюталарни қай йўсинда қўлга киритгани бўйича қуйдагича изоҳ берди.
"Мен бу пулларни топиб олганман. Маҳаллага кириш йўлида катта файл папка ётган экан. Қизиқиб очиб қарасам ичида доллар бор экан. Аввалига ҳақиқий деб ўйладим, сохталигини кейин билдим."
Ҳозирда ушбу ҳолат юзасидан суриштирув ишлари давом этмоқда.
Шунингдек, Қ.Ага нисбатан Чилонзор тумани ИИОФМ бошқармаси тергов бўлими томонидан Жиноят кодексининг 168-моддаси 3 қисм, яъни фирибгарлик бўйича жиноят иши қўзғатилди. Ҳозир унга нисбатан қамоққа олиш эҳтиёт чораси қўлланилган.
Муножат Валиева
