Qayd etilishicha, 1993 yil Qashqadaryo viloyatida tug‘ilgan fuqaro Yangiyo‘l shahridagi yashash manzilida onasi hamda ayoli bilan birgalikda qalbaki milliy valyuta tayyorlash bilan shug‘ullangan.
O‘tkazilgan tezkor tadbir davomida ulardan 19,6 mln. so‘m miqdoridagi 196 dona qalbaki 100 ming so‘mlik kupyura, 2 ta kompyuter, 2 ta rangli printer, qog‘oz kesish uskunasi va boshqa ashyoviy dalillar olinib rasmiylashtirildi.
Uning yashash xonadonida 1 dona pnevmatik to‘pponcha borligi ham aniqlanib, tegishli tartibda olib qo‘yildi.
Shu bilan birga, qalbaki valyuta sotib olish uchun kelgan Samarqand viloyatining Nurobod tumanida yashovchi, 1971 va 1984 yillarda tug‘ilgan, muqaddam sudlangan 2 nafar shaxs ham hibsga olindi.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, bundan avval DXX tomonidan qalbaki pul ishlab chiqarayotgan shaxslar aniqlangani hamda soxta dollarga telefon sotib olgan firibgar ushlangani haqida xabar berilgandi.
Cho‘lponoy Ahmedova