Toshkent metrosida poyezd to‘xtab qoldi
Holatga metropoliten rasmiy izoh berdi.
Bugun, 21-iyul kuni ijtimoiy tarmoqda Toshkent metrosi poyezdi to‘xtab qolgani aks etgan video tarqaldi. Holat yuzasidan metropoliten rasmiy munosabat bildirdi.
Ma’lum qilinishicha, havo haroratining isib ketishi sabab Sergeli yo‘li 1-bekatidan “Olmazor” metro bekati tomonga sekinlashtirilgan tezlikda harakatlanib kelayotgan elektropoyezd metroda o‘rnatilgan svetaforda qizil chiroq yongani sabab 15 soniya to‘xtab turgan.
Bunga elektrodepodan “Olmazor” metro bekati tomon yana bir poyezd harakatlangani sabab bo‘lgan. Ushbu poyezd bekatni tark etganidan so‘ng navbatdagi marshrut harakatlanishni davom ettirgan.
Eslatib o‘tamiz, bundan oldin Toshkent metrosining “Chilonzor” yo‘nalishidagi ikkita bekat oralig‘ida poyezd texnik nosozlik sabab to‘xtab qolgandi.
