Ikkita viloyatda elektr taʼminoti korxonasi xodimlari jinoyat ustida qo‘lga tushdi
Ular elektr tarmog‘idagi qarzdorliklarni yo‘q qilmoqchi bo‘lishgan.
Ikki viloyatda elektr taʼminotidagi qarzdorliklarni yo‘q qilib berishni vaʼda qilgan ETK xodimlari aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Qayd etilishicha, Yangiyo‘l tuman ETK texnigi O.T. va elektr taʼminoti guruh elektromontyori A.B. “M.U.” fermer xo‘jaligi rahbari A.U.ning ishonchiga kirib, fermer xo‘jaligi suv nasosini elektr tarmog‘iga noqonuniy ulanganligi holati yuzasidan tuzilgan dalolatnomani 12 mln so‘m evaziga yo‘q qilib berishni vaʼda qilib, shundan 10 mln so‘mni olgan vaqtlarida ashyoviy dalillar bilan ushlangan.
Departament hamda DXXning Samarqand tumani bo‘limlari tomonidan o‘tkazilgan tezkor tadbirda tuman ETK texnigi O.T. fuqaro T.V.ning xonadonida o‘rnatilgan elektr hisoblagich ro‘yxatdan o‘tmaganligi yuzasidan tuzilgan dalolatnomani hamda elektr taʼminotidan 6,1 mln so‘mlik qarzdorligini yo‘q qilib, yangi hisoblagich o‘rnatib berishi evaziga 5 mln so‘mni firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 214-moddasi (davlat organi, davlat ishtirokidagi tashkilot yoki fuqarolarning o‘zini o‘zi boshqarish organi xizmatchisining qonunga xilof ravishda moddiy qimmatliklar olishi yoki mulkiy manfaatdor bo‘lishi) bilan jinoyat ishlari qo‘zg‘atilib, tergov harakatlari o‘tkazilmoqda.
