Yangi Toshkent loyihasi Ozarbayjon Prezidentiga taqdimot qilindi

O‘zbekiston Respublikasi Prezidenti Shavkat Mirziyoyev va Ozarbayjon Respublikasi Prezidenti Ilhom Aliyev Yangi Toshkent shahrini barpo etish direksiyasiga tashrif buyurdi.

 

 

Tashrif davomida Ozarbayjon yetakchisiga Yangi Toshkentning bosh rejasi, qurilish ishlarining borishi, shaharning transport va muhandislik infratuzilmasi, shuningdek, istiqboldagi rivojlanish rejalari haqida taqdimot qilindi.

 

 

Yangi Toshkent shahri 20 ming gektar maydonda barpo etilmoqda. Istiqbolda bu yerda 2 million aholi yashashi uchun sharoit yaratilishi rejalashtirilgan. 2034-yilga qadar shaharda 200 mingta xonadon qurilishi ko‘zda tutilgan.

 

 

Loyihaning 6 ming gektarni qamrab olgan birinchi bosqichida zamonaviy turar joylar, ijtimoiy va biznes obyektlari, ta’lim hamda madaniyat maskanlari bunyod etilmoqda.

 

 

Xususan, “Yangi O‘zbekiston” universiteti, Nizomiy nomidagi O‘zbekiston milliy pedagogika universiteti va boshqa oliy ta’lim muassasalarining kampuslari qurilmoqda.

 

Yangi Toshkentni barpo etishda zamonaviy urbanistika, “yashil shahar” va energiya samaradorligi tamoyillariga ustuvor ahamiyat qaratilmoqda. Muhandislik kommunikatsiyalarini yer ostida joylashtirish, energiya tejamkor texnologiyalardan foydalanish, keng yashil hududlar va jamoat makonlarini tashkil etish rejalashtirilgan.

 

 

Shaharning transport infratuzilmasi ham zamonaviy talablar asosida shakllantiriladi. Yangi ko‘priklar va metro liniyasi, piyodalar hamda velosiped yo‘laklari Yangi Toshkentni poytaxtning mavjud hududlari bilan uzviy bog‘laydi.

 

Shuningdek, shaharda davlat idoralari, ilmiy va madaniy markazlar, mehmonxonalar, servis hamda biznes majmualari barpo etiladi. Loyihani amalga oshirishga mahalliy va xorijiy investorlar keng jalb qilinmoqda.

 

 

Tashrif davomida Prezident Ilhom Aliyevga Yangi Toshkentning maketi ham namoyish etilib, shaharda barpo etilishi rejalashtirilayotgan yirik obyektlar haqida batafsil ma’lumot berildi.