OTMlarda qolgan bo‘sh o‘rinlar ro‘yxati e’lon qilindi
Ushbu o‘rinlar uchun qo‘shimcha tanlovga ro‘yxatdan o‘tish 22-avgustdan boshlangan.
2026/2027-o‘quv yili uchun oliy ta’lim tashkilotlarining bakalavriat yo‘nalishlarida 31 833 ta vakant o‘rin qoldi. Bilim va malakalarni baholash agentligi OTMlarning umumiy qabul parametrlari doirasida qolgan vakant o‘rinlar ro‘yxatini e’lon qildi.
Ro‘yxatda kunduzgi, kechki va masofaviy ta’lim shakllari bo‘yicha OTMlar, bakalavriat ta’lim yo‘nalishlari hamda ta’lim tillari kesimida mavjud bo‘sh o‘rinlar ko‘rsatilgan. Shuningdek, tegishli yo‘nalishlar bo‘yicha fanlar majmuasi ham keltirilgan.
Qo‘shimcha tanlovda OTMlarning bakalavriat ta’lim yo‘nalishlariga kirish imtihonlarida qatnashib, kamida 56,7 ball to‘plagan, biroq talabalikka tavsiya etilmagan abituriyentlar ishtirok etishi mumkin.
Bundan tashqari, ro‘yxatdan o‘tishning ikkinchi bosqichida OTM va bakalavriat ta’lim yo‘nalishini tanlamagan abituriyentlarga ham fanlar majmuasi va ta’lim tili mos keladigan vakant yo‘nalishlarni tanlash imkoniyati berilgan. Qo‘shimcha tanlov uchun ro‘yxatdan o‘tish 22-avgustdan 28-avgustgacha davom etadi.
Abituriyentlar vakant o‘rinlarga to‘plagan ballari ketma-ketligiga qat’iy rioya qilingan holda, bazaviy to‘lov-kontrakt asosida talabalikka tavsiya etiladi.
Tanlov yakunlari bo‘yicha Bilim va malakalarni baholash agentligi tegishli tanlov qaydnomalarini shakllantirib, oliy ta’lim tashkilotlariga taqdim etadi.
